Ճիշտ ախտորոշումը` բուժման գրավական

Հարցազրույց կենսաբանական համակարգերի միջազգային ինստիտուտի բժշկական ախտորոշիչ կենտրոնի երևանյան մասնաճյուղի տնօրեն Արսեն Թորոսյանի հետ

Ե՞րբ է բացվել կենսաբանական համակարգերի միջազգային ինստիտուտի բժշկա-ախտորոշիչ կենտրոնի երևանյան մասնաճյուղը և ի՞նչ նպատակով:

- Երևանյան մասնաճյուղը աշխատում է 2012թ. հուլիսից: Կենտրոնն ապահովված է բարձր տեխնոլոգիական սարքավորումներով, որի շնորհիվ հնարավոր է դառնում հիվանդությունը ախտորոշել վաղ շրջանում, ուստի և բուժումը կազմակերպել առավել արդյունավետ:

Որո՞նք են այն էական առավելությունները, որ ունի Ձեր կենտրոնը նմանատիպ այլ կենտրոնների հետ համեմատած:

- Մեր կենտրոնում կատարվում են մագնիսառեզոնանսային տոմոգրաֆիական (ՄՌՏ) հետազոտություններ գերմանական SIEMENS ֆիրմայի արտադրության 1,5 տեսլա հզորությամբ բարձրադաշտ տոմոգրաֆի օգնությամբ, որը Հայաստանում միակն է: Այս սարքը հնարավորություն է տալիս ավելի բարձրորակ հետազոտություններ կատարել, քան կատարվում էին Հայաստանում գործող այլ կենտրոններում` ցածր մագնիսական դաշտ ունեցող տոմոգրաֆներով (0,2-0,5 տեսլա): 1,5 տեսլա հզորությամբ տոմոգրաֆի կիրառման շնորհիվ սխալվելու հավանականությունը հասցվում է նվազագույնի: Բացի այդ, սարքը բացարձակապես չի ճառագայթում, ուստի հետազոտվողների համար տարիքային սահմանափակումներ չկան: Այս հանգամանքը թույլ է տալիս նույնիսկ օրվա ընթացքում նույն հիվանդին հետազոտել մի քանի անգամ` հիվանդության զարգացման ընթացքին հետևելու նպատակով:

Նշեմ, որ մեր բժիշկ-ռադիոլոգները մասնագիտացել են արտասահմանյան լավագույն կլինիկաներում և գերազանց տիրապետում են իրենց գործին: Ավելին, եթե անհրաժեշտություն է լինում, ապա Սանկտ-Պետերբուրգում տեղակայված մեր խորհրդակցական կենտրոնի բարձրակարգ և փորձառու մասնագետները հեռաբժշկական ցանցի միջոցով անցկացնում են բժշկական խորհրդատվություն: Այն հիվանդները, որոնց կարելի է բուժել ռադիովիրաբուժության միջոցով, այսինքն` անարյուն վիրահատությամբ, նրանց ցանկությամբ, բուժումը շատ արագ կազմակերպվում է Սանկտ-Պետերբուրգում:

Հաջորդ առավելությունը աշխատանքային գրաֆիկի ճկունությունն է: Մենք աշխատում ենք մի քանի հերթափոխով և արագ, ինչը բացառում է հերթերի գոյացումը, իսկ եզրակացությունները տրվում են մի քանի ժամից մինչև երկու օրվա ընթացքում` ելնելով հիվանդության բարդությունից: Ծանրակշիռ առավելությունների հետ մեկտեղ` կենտրոնում գործում է հանրապետությունում ամենամատչելի գնացուցակը:

Ո՞ր օրգանները կարելի է հետազոտել տոմոգրաֆի միջոցով:

- ՄՌՏ հետազոտությունը արդյունավետ է բոլոր ոչ օդակիր (պարենխիմատոզ) օրգանների և փափուկ հյուսվածքների հետազոտության դեպքում: Այն անփոխարինելի է գլխուղեղի, ողնուղեղի, ողնաշարի, միջողնային սկավառակների, հոդերի, մկանների, ինչպես նաև ներքին օրգանների (լյարդ, լեղապարկ, ենթաստամոքսային գեղձ, փայծաղ, երիկամներ, մակերիկամներ, արգանդ, ձվարաններ, շագանակագեղձ և այլն) հետազոտության համար: Մեր կենտրոնի շնորհիվ ՄՌՏ հետազոտությունը Հայաստանում կատարվում է նաև լեղատար և միզատար ուղիների հիվանդությունների ախտորոշման նպատակով:

ՄՌՏ հետազոտություն իրականցնելու համար կա՞ն հակացուցումներ:

- Գրեթե չկան, միայն հակացուցված է այն հիվանդների հետազոտությունը, ովքեր կրում են կարդիոստիմուլյատոր և այնպիսի մետաղներ, որոնք կարող են ենթարկվել մագնիսական դաշտի ազդեցությանը: Հարաբերական հակացուցում են համարվում կլաուստրոֆոբիան և հղիության առաջին եռամսյակը: 

Մագնիսառեզոնանսայի՞ն, թե՞ համակարգչային տոմոգրաֆիա (ՀՏ): Որո՞նք են դրանց տարբերությունները:

- Դրանց միավորում է միայն շերտավոր սքանավորման սկզբունքը: ՀՏ հետազոտությունը իրականացվում է ռենտգենյան ճառագայթների, իսկ ՄՌՏ հետազոտությունը` հաստատուն մագնիսական դաշտի միջոցով: ՄՌՏ հետազոտությունն առավել տեղեկատվական է նյարդային կառուցվածքների, այդ թվում` գլխուղեղի և ողնուղեղի, տեղային և դիֆուզ ախտահարումների ժամանակ, իսկ ՀՏ-ն կիրառելի է ոսկրային վնասվածքների և թոքային ախտահարումների դեպքում: ՀՏ հետազոտության ժամանակ հիվանդը բավականին բարձր չափաբաժնով ճառագայթում է ստանում, իսկ ՄՌՏ հետազոտության ժամանակ ճառագայթում ընդհանրապես չկա և այն լիովին անվնաս է: Երբեմն, սակայն, լինում են դեպքեր, երբ ճշգրիտ ախտորոշելու համար բժիշկները ստիպված են լինում երկու հետազոտություններն էլ իրականացնել:

Մեզ կարող եք դիմել`www.mrt.am, 010 428 311, 010 428 312

Հարցեր, պատասխաններ, մեկնաբանություններ